&& رحلتي إلى صحراء الدهناء && 40 صورة .. - سياحتي سعودية

أبو حمد · #1 04-04-2008, 10:31 AM

السلام عليكم ورحمة الله وبركاته ..

أحبائي ..

أحببت المشاركة معكم هنا عرض تقرير لأحد زياراتي لأحد الصحاري السعودية ..

وهي صحراء الدهناء ..

&& رحلتي إلى الدهناء && 40 صورة ..

قبل البدء كلمة ..

قبل أن أدخل بالموضوع أحب أنبه على عدة أمور ..

1/ أن الصور توثيقية وليست احترافية .. ( يعني لا تدققون واجد )
2/ الكاميرا المستخدمة : Nikon D80
3/ العدسات المستخدمة : 18-135 Nikon و Tamron 70 – 300 ماكرو وزوم
4/ بما أن الكلام طوييييييل كتبته باللهجة العامية القصيمية .. ( مشي حالك ! )

وقسمت هذا الموضوع إلى أربعة أقسام ..

القسم الأول : قصة الطلعة .

القسم الثاني : جو الطلعة.

القسم الثالث : الاحتطاب .

القسم الرابع : مواقف وأحداث .

أبدأ مستعيناً بالله بـ

القسم الأول : قصة الطلعة :

أحد الشباب يموووووووت بشي اسمه ( حطب ) ويعشق شي اسمه ( نفود )

دق علي ...

وقال يابو حمد .. الحين وقت اختبارات ,, وتعرف .. وشلون الطلعة ( يصير لها مذاق خاص! ) بالاختبارات ..

قلت ( الله يعينكم أبنائي الطلاب) !!

ويقول ..

كل ما مسكت المذكرة ,, تذكرت البر والحطب ..

همن ضااااعت المعلومات ..

فــ وش رايك نطلع نحطب ..

قلت متى ؟

قال أبختبر المحاضرة الثانية يوم الأربعاء .. ونمشي بعده ..

قلت شف عن الشاب وأنا إن شاء الله أبلحقكم .. ما أقدر أمشي إلا بعد العشاء ..

قال .. خلاص ..

دق علي الثلاثاء .. قلت بشر .. وش صار على الشباب ؟

قال الجازمين 3 واثنين من الشباب ( شكوك ) ..

ونبي نمشي الضحى ..

قلت .. وين ..؟؟

قال .. وش رايك .. بمكاننا اللي بالدهنا الي حصل فيه كذا وكذا ..

قلت الله يساعدكم ..

وأنا الساعة 10.30 م إن شاء الله أصير عندكم ..

مشوا الشباب وهم ( 2 نفر ) للموقع ..

ووصلوا آخر الظهر ..

على هالمزيزون .. ( ماشاء الله ) .. :

وأنا قضيت بعض الأشغال بعد العشاء .. واتصلوا علي الشباب اللي مترددين .. وقالوا نبي نخاويك ..

مريتهم .. ومشينا للموقع .. ( طبعاً ) على مزيونتي :

يعني :
عددنا 5 شباب ..

والمواتر 2

وصلنا الشباب الساعة 10.40 دقيقة ولقينا القهوة والشاهي جاهزات ..

وخاصة من يد أحد الشباب له مذاق خاص .. :

جلسنا جلسة ما تنسى ..

مع الشباب اللي يفتحون النفس – شرواكم - ..

وكان موضوع السواليف ,, مثير – نوعاً ما - ..

( عزوبية ) أكيد وش يسولفون به ؟

• مثال ..

أحد الشباب نحاول نقنعة يعرس ..

ونقول له .. العرس ما يكلف شي – إن شاء الله – ويتيسر إذا كان الواحد نيته زينه .. وترا المسألة كله بسيطة لا يمكن تتعدى التكاليف مائة ألف ريال ..

أسكت رفيقنا شوي .. وأخذ يفكر .. قلنا شكله اقتنع إن شاء الله ..

لكن ..

تفاجأنا برده يوم قال ..

لو معي مائة ألف كان شريت حوض بريمي ونش ودفلك !!!!

( يعني لا يكثر !! )

بعده قام سموي الكريم وتستس الكاتم .. :

تعشينا ,, وجلسنا على الضوية ,,

وبعدها ,, كلن ,, فل فراشه ونااااااااام ..

المهم ,,

أصبح الصبح ..

صلينا الفجر .. وجلسنا عند الضوية ..

وكان الجو وايد حلو ..

قام رفيقنا راعي القهوة وحكحك لنا دلة قهوة ..

طبعاً النجر شي أساسي عنده !! :

إذا قعد يصلح القهوة كأنه يصلح ذبيحة !!

--------------------------------

-- انتهى القسم الأول --

======================

القسم الثاني .. جو الطلعة :

كانت الأرض –سبحان الله- جدبااااء ومغبرة ..

نسأل الله أن يغيثنا وأن يعاملنا بما هو أهله ولا يعاملنا بما نحن أهله .. :

لكن كان الجو كان حلو ..

الشمس ما تطلع إلا فترات بسيطة ,,

وكان الهواء بارد يرد الروح ..

ويوم جاء الظهر .. نزل علينا مطر –طبعاً- خفيييف .. لكن له طعمه الخاص ..

والتقطت كم صورة للجو .. :

-----------------

--------------

-----------

وهذي أثناء نزول المطر : ( ترانا ماحرثنا الأرض ! )

--------------------

وهذي السحب ( بعد صلاة الظهر ) :

=======================

القسم الثالث .. ( الاحتطاب )

بعدما ارتفعت الشمس ..

-----------

قمنا نحطب من الارطى ..

----------

شغلنا المواتر ..

-------

طبعاً نسمنا كفرات الهايلوكس ..

لأن فيه قاعدة مهمة – أقدسها كثيراً - ..

وهي : اجلد الكفرات ولا تجلد السيارة ..

لأن الكفرات أكلف ما عليك تغيرهن ,,

لكن السيارة مع الجلد .. الله يخلف ,,

كان الارطى عارضن جنبه .. !!

أنواع وأشكال .. :

------------

طب وتخير !! :

---------

كان هنا شجرة ارطى !!! :

--------

الفريسة بصندوق الجيب .. :

------

وهذا أحد الشباب متحمس – ما شاء الله عليه -:

------

بعد ما انتهينا ..

طبعاً قسمنا الحطب بين الجيب والهلي علشان أمور أمنية لا تخفى عليكم !!

-- هنا ينتهي القسم الثالث --

===============

القسم الرابع : مواقف وأحداث :

حصل لنا بعض المواقف أثناء الطلعة ..

كانت محزنة أحياناً ومضحكة أحياناً أخرى ..

الموقف الأول .. البنزين ..

يوم مشيت من بريدة كان البنزين على خط النصف .. قلت لعلي أعبي من محطات ( قبة ) علشان أدخل الدهناء والبنزين على الفل ..

لكن ..

نسيييييت !!

ماتذكرت إلا يوم دخلت الدهناء شفت النزين أقل من الربع !!

لاحول ولا قوة إلا بالله ..

وش الحل ؟؟

المشكلة أقرب محطة تبعد عنا 40 كم ..

بعد مشاورة الشباب ..

اتفقنا على ( الصباح رباح ) ..

إاذا جاء الصبح أروح للمحطة .. وأعبي وأرجع ..

وفعلاً .. يوم طلعت الشمس ..

رحت أنا وأحد الشباب للمحطة ..

لكن ..

يوم وصلنا الخط .. لقينا بقالة على الخط تبيع بنزين بجراكل ماء !!

سألناه بكم الجركل الكبير ,,

قال بـ 11 ريال ..

قلنا توكلنا على الله ..

عب يامدير ..

الجركل الأول :

-------

الجركل الثاني :

----------

بعد ما عبينا جركلين ارتفع الانبير فوق النصف ..

فــ رجعنا للشباب ,, وكفانا البنزين إلى بريدة ..

* * * * *

• الموقف الثاني . . ( أم جنيب )

أثناء حطبنا ,, لقينا شجرة أرطى كبيرة .. قال أحد الشباب جبت الواير يابو... ؟

قال ,, أووو معليش نسيت أجيبه .. قال واحد .. يمكن خيره ..

فقررنا ( نشيله ) بالمسحات ..

فــ تفاجأنا بــ ( أم جنيب ) عند الجذع !! يعني لو كان معنا واير – والعلم عند الله – كان ممكن تلدغ اللي يربطه على الجذع ..
فاللهم لك الحمد ..

صورة لأم جنيب عند الجذع :

------

تمت مطاردة الداب من قبل ( المهبّل ) وكأنها سحلية ..

يوم كنت أصور أم جنيب ..

تنفخ علي وتطلع لسانه .. ( هجيييج ) ,, وكنت مستعد لـ ( الهروب ) .. فما أدري أنا أوزن الفوكس .. أو أهرب .. أو أضبط الكاميرا .. ( والله حاله ! )

بعد فترة –ليست بالطويلة- من مطاردة أم جنيب ,,

تفاجأنا بشي غريب .. !!

أحد الشباب ,, جاء من ورا أم جنيب شوي شوي !!

كأنه يبي يمسك أرنب !!

صرخنا بوجهه وقلنا يافلان ابعد لا تقرصك ,,

ولا حياة لمن تنادي !!

ثواني بسيطة ..

عجزت أصدق عيوني !!

وأترك المشهد أمامكم :

----------

تشوفون اللي أشوف ؟؟؟: !!!

طبعاً مسك الداب الصغيرة ورفعها فوق ..

مع أننا ما ضربناه أي ضربة !!

ما ندري هل نصيح ؟ أو نضحك ؟

بعض الناس ( تنسيييم )

والمصيبة العظمى .. أنه رمى الداب علينا ( يمزح ) !!!

أي والله مزح !!

...

بعد فترة من الضحك ..

حطينا أم جنيب بقارورة ,, وأخذته معي لبريدة ..

وعطيته البنقالي ( دلوار ) ..

وذبحه ..

لكن ..

بعد موقف الداب ..

أصبح كل شي كأنه داب !!

• مثال ..
بعد الموقف بدقايق كنت أمشي ومشى شي قدامي ..

نزيت ,,

لكن ..

تفاجأت أنه ( سحلية ) !! ..

......

الموقف الثالث : وحدة بوحدة :

أثناء الاحتطاب ..

كنت أدور بالسيارة أبحث عن شجرة أرطى ( كبيرة ) تستاهل الوقفة ..

شفت رفيقي لاهي .. يمشي بالجيب .. يدور فريسة ..

قلت بقلبي .. مشتهي مزح ..

جيت كأني أبكلمه ..

يوم وصلته ..

نوفرت عليه .. .

ولذت بالفرار ..

أسكت كأنه ما صار شي ..

مضت دقائق ..

نسيت السالفة ..

وقفت والسيارة بنزلة خفيفة وهي نازلة مع قدام شوي ..

يعني ما ترجع .. ما تطلع إلا قدام ..

نزلت عند مجموعة من الأرطى أحطب .. وخليت السيارة تشتغل ..

مادريت إلا الرجال جاي .. ونزل معه المسحاة ..

وبدأ يحفر خلف الكفرات الخلفية بسيارتي !!

بعد ما وقّف الجيب بوجه سيارتي ..

( تحجييير )

قلت بنفسي .. مالي إلا أتعامل مع الموقف ببرود زايد ..

قلت .. إذا انتهيت علمن ..

يوم انتهى ..

ركب سيارتي ..

وكتم للبنص بالريوس ..

حتى ( تعلقت ) !!

وقال .. يالله تعال اطلع ..

-

قلت بنفسي ,, ( والله بلشة ) .. وش أسوي ؟؟

رحت بسرعة للجيب .. لقيت المفتاح على ( السويتس ) ..

جيت أبشغل وأهج بالجيب ..

لكن ..

تفاجأت بيد تدخل وتسحب المفتاح !!

قلت .. أيضاَ لازم أتعامل مع الموقف ببرود أكثر ..

والرجال قاعد عند السيارة وبيده المسحات !!

قلت .. بس ؟

الحين أطلعه إن شاء الله وأغبر عليك مرة ثانية ..

حاولت أطلع السيارة ..

قلت أفضل طريقة ..

أهزز السيارة بالكلتش فقط .. دون البنزين ..

هززت السيارة أكثر من ربع ساعة ..

وعطّب الكلتش !!

يوم بقى شوي وتطلع ..

قال تبي أبعد عنك ..

أخذتن العزة بالإثم .. قلت لا !

وبعد محاولات طلعت ..

رجعت مسرع

وغبرت عليه مرة ثالثة ..

وكانت مزحة نشطتنا شوي ..

لكن .. اللي لا يمكن أنساه بالموقف هذا ,,

أن رفيقي يوم هممنا بالرجوع ..

اعتذر ..

وقال .. آسف يابو حمد .. !!

مع أن المسألة كلها مزح .. وأنا اللي أثرت السالفة كلها ,,

لكن ..

بعض الشباب يعجبك بأخلاقه .. ومعاملاته ..

( أسأل الله له التوفيق والسداد )

===============

آآآآآآسف على الإطالة ..

وأكرر اعتذاري عن رداءة الصور ..

ورداءة الأسلوب ..

لكن ..

( المسألة كلها سواليف )

وتقبلوا تحيات محبكم :

وفي الختام ..

هذي هدية مني لكل من نور موضوعي المتواضع :

والسلام عليكم ورحمة الله وبركاته >>

أدوات الموضوع	إبحث في الموضوع
مشاهدة صفحة طباعة الموضوع أرسل هذا الموضوع إلى صديق	إبحث في الموضوع: البحث المتقدم

العضو التالي يقول شكرا لك أبو حمد على هذه المشاركة القيّمة:
صالح الجبيلي (11-05-2008)

الذين يشاهدون محتوى الموضوع الآن : 1 ( الأعضاء 0 والزوار 1)